Aanamagumbo geli 11 yokoshikandjohogololo Epembe, moshitopolwa Ohangwena, mboka yali ya lelwapo kiiponga yomililo omathimbo gapiti oya mono omakwatho okuza koshiketha Vatela Oshiwana Foundation mOndangwa oshiwike sha piti.
Omukokoli goshiketha shoka omusamane Cornelius Paulus, okwa ku thileko Eagle FM, kutya omagumbo ngoka ogapi komililo dheetithwa kepeya ndyoka lya lopotwa moshitopolwa Ohangwena omwedhi gwaziko.
Okwa hokolola kutya aakalimo mboka, oya kala yeli moompumbwe dhomeendelolo oshoka omagumbo gawo oga pyapo noonkondo noyeli mompumbwe yiikulya niizalomwa.
Paulus, okwati aakalimo mboka oya pewa ooshako dhuusila womahangu dhili 35 kehe yimwe oyo 10KG, oohi oonkunkuntu dha topolwa muunayilona wuli 44, iizalomwa 177 oshowo omapando goongaku geli 10.
Iikulya mbyoka oya gandjwa, oku pitila mombelewa ya kansela goshikandjohogololo Epembe Phillip Shikongo.
Omikunda ndhoka dha dhengwa koshiponga shomulilo ongaashi: Etyapa, Oshilu, Oshipya, Oluungu, Ohamukulungudju, Epembe, Oshamono, Eshii, Ohamutundu, Ohamwiimbi nEenheni.
Paulus otati kehe omukunda omwa lopotwa egumbo limwe alike ndyoka lya mona oshiponga shomulilo gweetithwa kepeya.
Kansela goshikandjohogololo Shikongo, okwati oshikandjohogololo shawo osha kala nuupyakadhi wepeya, moka aakalimo yamwe omagumbo gawo ga gumwa koshikumungu shoka. okwiindile aantu yiikaleke kokule noku fika epeya owina, oshoka ota li eta uupyakadhi we yonagulo lyuushitwe oshowo eyonagulo lyomaliko ngaashi oondhalate nuulithilo wiimuna.
“Aantu naya kale wo yoopaleka omahala gawo ngaashi kooha dhomagumbo, nokooha dhomankolo, nuuna epeya lya tukuka, itali vulu oku taandela kondhalate ya mushiinda nenge likwate kegumbo, uuna aantu taya fike omathita, naya kwashili paleke kutya omililo odha dhimwa thilu opo dhaa ha andjakane komahala galwe,” Shikongo tati.